Դեղերի մեծածախ իրացման լիցենզավորում

Դեղորայքային քաղաքականություն

ապրիլի 20, 2026

Դեղերի մեծածախ իրացումը ներառում է մատակարարի կողմից դեղ արտադրողից կամ դեղի գրանցման հավաստագրի իրավատիրոջից կամ այլ մատակարարից դեղեր ձեռք բերելը կամ ներմուծելը կամ արտահանելը կամ պահպանելը կամ իրացնելը (բաշխելը), բացառությամբ սպառողներին դեղերի իրացման:

Պահանջներ

Դեղերի, դեղանյութերի, դեղաբուսական հումքի մեծածախ իրացումը իրականացնում են մատակարարները` սահմանված կարգով մեծածախ իրացման լիցենզիա ստացած իրավաբանական անձինք կամ անհատ ձեռնարկատերերը:

Մեծածախ իրացման լիցենզիան տրամադրում է ՀՀ առողջապահության նախարարությունը (այսուհետ՝ ՀՀ ԱՆ)` ՀՀ ԱՆ Դեղերի և բժշկական տեխնոլոգիաների փորձագիտական կենտրոնի (այսուհետ՝ Կենտրոն) փորձագիտական եզրակացության հիման վրա: Հետևաբար, մինչև լիցենզիա ստանալու հայտը ՀՀ ԱՆ ներկայացնելը, անհրաժեշտ է դիմել Կենտրոն՝ դիտարկում իրականացնելու և փորձագիտական եզրակացություն տրամադրելու նպատակով: Լիցենզիաները գործում են միայն լիցենզիայում նշված վայրում:

Լիցենզիայի տրամադրումը մերժվում է «Լիցենզավորման մասին» ՀՀ օրենքի 29-րդ հոդվածով նախատեսված հիմքերով:

Մեծածախ իրացման լիցենզիաների տրամադրման և այդ նպատակով իրականացվող փորձաքննության համար գանձվում է պետական տուրք` «Պետական տուրքի մասին» ՀՀ օրենքով սահմանված կարգով և չափով:

Անհրաժեշտ փաստաթղթեր

Հայտ:
Լիցենզավորման ենթակա գործունեության իրականացման համար նախատեսված տարածքի նկատմամբ հայտատուի սեփականության (օգտագործման) իրավունքի պետական գրանցման վկայականի և իրավասու մարմնի կողմից հայտատուի անվամբ տրված գործունեության համար նախատեսված տարածքի հատակագծի պատճենները:
Դրական փորձագիտական եզրակացություն՝ տրված Կենտրոնի կողմից:
Պետական տուրքի վճարման փաստը հավաստող փաստաթուղթ:

Տրամադրման կարգ ու ժամկետներ

Փաստաթղթերը ներկայացվում են ՀՀ ԱՆ առձեռն կամ փոստով կամ էլեկտրոնային համակարգի միջոցով՝ Հայաստանի Հանրապետության կառավարության 2010 թվականի սեպտեմբերի 24-ի N 1283-Ն որոշմամբ սահմանված կարգով:
Մեծածախ լիցենզիաները տրվում են անժամկետ` պահանջվող բոլոր փաստաթղթերը ներկայացնելուց հետո` 23 աշխատանքային օրվա ընթացքում, թղթային կամ էլեկտրոնային եղանակով: