Դեղերի գովազդի թույլտվություն

ապրիլի 20, 2026

Դեղի գովազդը դրա նշանակումը, մատակարարումը, իրացումը, կիրառումը և սպառումը խթանելու նպատակով տեղեկատվության տարածումն է, որը կոչված է ձևավորելու կամ պահպանելու հետաքրքրություն դրա նկատմամբ և ընդգրկում է`

1) դեղի գովազդը սպառողների շրջանում.

2) դեղի գովազդը բժշկական և դեղագործական համակարգում գործունեություն իրականացնող անձանց շրջանում և բժշկական հաստատություններում.

3) դեղ իրացնողների ներկայացուցիչների այցելությունը բժշկական և դեղագործական համակարգում գործունեություն իրականացնող անձանց, ներառյալ` այցելությունները բժշկական հաստատություններ.

4) դեղի անվճար նմուշի տրամադրումը.

5) դեղի ցանկացած այլ տիպի գովազդ:

Պահանջներ

Դեղի գովազդը կարող է իրականացվել միայն ՀՀ առողջապահության նախարարության (ՀՀ ԱՆ) թույլտվությամբ՝ ՀՀ ԱՆ Դեղերի և բժշկական տեխնոլոգիաների փորձագիտական կենտրոնի (այսուհետ՝ Կենտրոն) փորձագիտական եզրակացության հիման վրա: Հետևաբար, մինչև դեղի գովազդի թույլտվության հայտը ՀՀ ԱՆ ներկայացնելը, անհրաժեշտ է դիմել Կենտրոն՝ գովազդային նյութի փորձաքննության եզրակացություն ստանալու համար:

Գովազդի տեքստը պետք է համապատասխանի գրանցման ժամանակ հաստատված ընդհանուր բնութագրի տվյալներին:

ՀՀ-ում չգրանցված կամ հսկվող կամ դեղատանը ըստ դեղատոմսի կամ դեղագրությունների պատրաստվող դեղի գովազդն արգելվում է:

Զանգվածային լրատվության միջոցներով կարելի է գովազդել այն դեղը, որը պատկանում է առանց դեղատոմսի տրվող դեղերի խմբին և չի պարունակում թմրամիջոցներ և հոգեմետ (հոգեներգործուն) նյութեր:

Գովազդի նպատակով դեղը ուղղակիորեն սպառողին կամ բժշկական և դեղագործական համակարգում գործունեություն իրականացնող անձանց տրամադրելն արգելվում է:

Դեղի գովազդի թույլտվության տրամադրումը մերժվում է «Դեղերի մասին» ՀՀ օրենքի 28-րդ հոդվածի 11-րդ մասով և ՀՀ կառավարության 2025 թվականի մարտի 27-ի N 342-Ն որոշմամբ նախատեսված հիմքերով:

Գովազդի թույլտվության տրամադրման և այդ նպատակով իրականացվող փորձաքննության համար գանձվում է պետական տուրք` «Պետական տուրքի մասին» ՀՀ օրենքով սահմանված կարգով և չափով

Անհրաժեշտ փաստաթղթեր

Հայտ
Գովազդի տեքստը` սցենարով (նկարագրությամբ), իսկ լրատվության էլեկտրոնային միջոցներով գովազդ իրականացնելու դեպքում նաև գովազդային հոլովակը` էլեկտրոնային տարբերակով.
Գովազդային նյութի փորձաքննության եզրակացությունը.
Պետական տուրքի վճարման փաստը հավաստող փաստաթուղթը:

Տրամադրման կարգ ու ժամկետներ

Գովազդի թույլտվության հայտը բավարարվում կամ մերժվում է հայտը և փաստաթղթերը ներկայացնելու օրվանից մինչև 7 աշխատանքային օրվա ընթացքում: Գովազդի թույլտվություն տրամադրելու մասին հրամանին կցվում են գովազդի թույլտվությունը, գովազդի տեքստը և (կամ) հոլովակը` հաստատված ՀՀ ԱՆ կնիքով և համաձայնություն տալու մասին նշագրմամբ: